कविता : स्वतन्त्र चरि

कविता : स्वतन्त्र चरि

                                           राजेश नेपाली नेटवर्क, फागुन १६।  म चरि हुँ 

स्वतन्त्र चरि 

मलाई तिमी स्वतन्त्र उडेको मात्र देख्छौ 

मलाई तिमी रमाएको मात्र देख्छौ 

तिमी मेरो मन अनि भावना बुझ्न सक्दैनौ 

मलाई तिमी ,

मात्र स्वतन्त्र देख्छौ 

तिमीलाई के थाहा 

मलाई घरि घरि तिमीले नै सताइरहेका छौ 

म जहाँ हुन्छु 

तिमी त्यहीँ ढुङ्गा हान्छौ 

मैले आराम गरिरहँदा , 

तिमीलाई उडाउन मज्जा आउँछ 

म तिमीलाई नै खुसि पार्न भएपनि उडिरहन्छु 

मलाई तिमी नै उडाउँछौ घरिघरि 

अनि भन्छौ स्वतन्त्र चरि 

म तिमी भएको ठाउँमा किन बस्दिन 

यो तिमी कहिल्यै सोच्दैनौ 

म तिमी देखि परै बस्छु 

थाकेर बस्छु 

तर , 

तिमी उडाउन छोड्दैनौ 

नजिक भए कराएर उडाउँछौ 

टाढा भए ढुङ्गा हानेर उडाउँछौ 

मलाई थकान मार्न दिदैनौ 

अनि भन्छौ स्वतन्त्र चरि 

वियोगको पिडा तिमी भन्दा म जान्दछु 

तिमी मेरो जस्तै जोडि बनाउन चाहान्छौ तर ,

जानिजानि मेरो जोडि छुटाउँछौ 

रमाउन मन मलाई पनि लाग्छ तिमीसँग 

तर , डर लाग्छ 

अनि म तिमीलाई देख्नासाथ भाग्छु 

म भाग्दा तिमी रमाउँछौ 

अनि भन्छौ स्वतन्त्र चरि 

हो म चरि हुँ स्वतन्त्र चरि

लेखक 

बबिता रिजाल (प्युठान)